May positibo kag negatibo nga epekto sa mga pumuluyo ang pagpalawig sang termino sang mga Barangay kag Sangguniang Kabataan officials.
Sa interview sang Bombo Radyo kay Mr. Niño Angelo Dela Paz, Sangguniang Kabataan Federation President sang President Roxas, Capiz, iya ginpahayag nga makabulig ang pagpalawig sang termino sa pagpadayon sa continuity sang mga proyekto kag programa sang mga opisyal sa barangay kag SK.
Suno kay Dela Paz, isa man ini ka tion para mapamatud-an sang mga incumbent officials nga nagakadapat sila sa ila mga pwesto paagi sa ila pagserbisyo sa mga pumuluyo.
Apang, ini nga tikang, mahimo man ipaanggid sa pagkuha sang right to suffrage ukon kinamatarong sang mga pumuluyo nga magboto bangud pila na ka beses nga gin-postpone ang Barangay kag SK Elections.
Dugang pa niya, malawig pa ang proseso sang pagpalawig sang termino bangud magaagi pa ini sa bicameral conference committee kag kinahanglan pa sang dugang nga mga tikang antes ini mangin pinal.
