ROXAS CITY – Malaka lamang ang mga tawo nga nagalagaw sa Baybay Beach sa Barangay Baybay, Roxas City kadungan sang selebrasyon sang kapiyestahan ni Sr. San Juan de Bautista subong nga adlaw.
Ini ang naobserbahan sa paglibot mismo sang Bombo Radyo News Team.
May tagsa-tagsa naman ka pamaagi ang mga residente sa pag-selebrar sang amo nga kahiwatan kapareho sang pagpatukar sang mga sunata sa ila tagsa ka panimalay.
May pipila ka indibidwal nga nasiplatan nga nagatuyo nga magpaligo apang ginasita ini sang mga katapo sang Philippine Coast Guard (PCG)-Capiz.
Mahibaluan nga may gindihon nga deployment plan ang (PCG)-Capiz kadungan sang amo nga selebrasyon.
May ginpang-deploy nga katapo sang PCG agud magmonitor sa mga indibidwal nga magapadulong sa pila ka mga baybayon sa probinsiya.
Magluwas diri may mga floating assets man nga nakahanda sa tion sang emerhensiya.
May mga personnel man nga ginpang-deploy sa mga kasubaan nga posible padulongan sang mga indibidwal.
Ginmandu naman ni City Mayor Ronnie Dadivas ang hugot nga pagdumili sa pagpaligo sa mga baybayon nga sakop sang siyudad sang Roxas.
Suno sa isa ka residente nga nagbakal lamang sila sang gamay nga lulutuon para sa iya panyaga kag wala na nagpang-imbitar sa ila mga kakilala.
Talalupangdon man suno diri nga wala halos sang may nagapaligo bangud hugot ang pagpangsita sang mga otoridad.
