ROXAS CITY -Ginkaakig sang punong barangay sang Barangay Katipunan, Tapaz, Capiz ang natabo nga pagpalupok sang armas-luthang sang mga katapo sang New People’s Army (NPA) malapit sa detachment sang mga militar sa amo nga barangay.
Ginpahayag ni Punong Barangay Jennylyn Bilbao nga indi na bag-o sa mga residente ang mga pagpangharass sang mga rebelde.
Apang ginkaakig sini ang nasambit nga aktwasyon bangud suno sa iya nagatuga ini sang kakulba kag kahadlok sa mga residente.
Suno sa kay Bilbao nga indi mahimo nga pahalinon ang mga militar sa Barangay Katipunan bangud nagakahilanglan man sila sang dugang nga seguridad.
Gindugang pa ni Bilbao wala man sang may nagakahinabo nga kinagamo sa lugar kun wala ginauhan sang rebelde nga grupo ang mga naka-assign diri nga mga militar.
Samtang nagpanawagan man si Bilbao sa mga katapo sang rebelde nga NPA kag militar nga kun luyag nila nga mag-engkwentruhanay, likawan nga himuon sa nasambit nga barangay agud malikawan nga madalahig ang mga inosente nga mga residente.
