ROXAS CITY – Ginakabig nga isa lamang ka pamaagi agud maatrasar ang pagpangampanya ni anay US President Donald Trump, matapos nga mapamatbatan ini sang korte sa New York sang 34 counts.
Sa interview sang Bombo Radyo kay Bombo International Correspondent Rufino Pinoy Legarda Gonzales direkta sa California USA, ginpahayag sini nga nagresulta ini sang negatibo nga epekto para sa democratic kag positibo naman kay Trump.
Suno kay Gonzales, nangin tunga ang opinion sang mga amerikano subong man sang mga Pilipino nga yara sa Estados Unidos matapos naglupok ang nasambit nga isyu.
Mahibaluan nga ginpamatbatan sang 34 counts si Trump sang korte sa New York may kaangtanan sa pagpameke sang iya mga business records.
Angut sini, ginbasa sang 12 ka mga jurado ang nasambit nga findings sa atubang mismo ni Justice Juan Merchan.
Ang 34 counts ang nagikan sa 11 invoices, 12 vouchers kag 11 nga tseke nga bulanan nga reimbursement ni Trump sa pagbayad sini kay Michael Cohen nga indi magpaguha sang anu man nga detalye agud maprotektahan ang iya imahe sa 2016 election.
Pahayag pa ni Gonzales nga mahimo sa gihapon nga magpapili si Trump apang ma-atrasar lamang bangud sa ginapangatubang sini.
Apang, dako suno diri ang tsansa nga mangin madinalag-on ini bangud kadam-an nga mga amerikano ang nagpabutyag sang ila kalain sang buot bangud daw kaangay nga indi nangin patas ang ila layi.
