Ginkumpirmar sang personnel sang isa ka slaughterhouse nga gapamalibad ang mga ini sa pila ka mga persona nga nagapaihaw sa ila sa Barangay Poblacion, banwa sang Panitan.
Sa interview sang Bombo Radyo kay Mr. Hesus de Juan, personnel sang slaughterhouse, ginpahayag sini nga nagabalibad ang mga ini bangud ang mga baboy nga ginadala sang pila ka mga indibidwal ang wala ginabaligya sa sulod sang merkado publiko.
Dugang pa sini, kun batunon nila ang mga ginapaihaw nga baboy nga wala nag-agi sa legal nga proseso, posible suno diri sila balikan sang mga otoridad.
Nahibaluan nga may ginasunod ini sila nga nagakaigo nga proseso kag ini ang alinsunod sa ginpatuman nga ordinansa sang Munisipyo sang Panitan nga Executive Order No. 10, Series of 2023 nga gin-release ni Mayor Katherine Dequiña Belo angut sa pamahog sang African Swine Fever.
Pinaagi sa nasambit nga ordinansa, ginatatakan ang tagsa ka mga baboy nga na-verify na kag napamatud-an nga ini ang nagikan sa merkado kag nag-agi sa legal nga proseso.
Nagasunod lamang suno ang mga ini sa mandu sang tag-iya sang slaughterhouse kag sang mga otoridad.
