Balantayan sa masunod nga Miyerkules nga adlaw ang mangin disposition sang provincial legal office sang gobyerno probinsiyal angut sa kontrobersiyal nga pagpangkutkot sang buho sa propedad sang mag-asawa nga Reynaldo Kag Ninfa Saligumba sa Sityo Tipulo, Purok Paghidait, Barangay Putian, Cuartero, Capiz.
Ginpahayag ni Jamela Montoya, pinuno sang MENRO sa banwa sang Cuartero nga nagkasugot na sila sang mag-asawa nga Saligumba sang Mayo 10 sa ginpatigayon nga sinapol, untaton ang pagpangkutkot kag magsecure sang permit antes liwat magbalik sa ila operasyon.
Apang sang Hunyo 1, 2021, na-monitor sang MENRO-Cuartero kag CAPENRO nga padayon ang pagkutkot sang buho sa nasambit nga propedad sa pihak sang notisya kag paandam nga mag-untat sa ila operasyon.
Nakumpirma nga wala nag-untat sa ila operasyon matapos ginpamangkot ang nagaserbe nga caretaker nga nag-ako nga padayon ang pagkutkot sang buho.
Suno pa kay Montoya nga posible nga nagapamulawan sila.
Gin-athag pa sang opisyal nga indi man mahimo ma-sanction ang mag-asawa nga Saligumba bangud wala nadakpan sa akto nga nagapatigayon sang pagkutkot.
Samtang ginsuportahan naman sang isa ka residente ang pahayag sang caretaker nga padayon ang operasyon sa pihak sang ginhatag nga notisya, bangud may nakita ini nga apat ka mga tawo nga nagsulod sa amo nga propedad dala ang bara, pala kag iban pa nga kagamitan.
#OverAllConsistentNumber1saCapiz
#BastaRadyoBOMBO
