Ginpasalig sang Bureau of Fisheries and Aquatic Resources (BFAR) nga wala sang interruption sa pagpanagtag sang ₱3,000 fuel subsidy para sa mga mangingisda sa bug-os nga pungsod agud maamligan ang ila palangabuhian batuk sa epekto sang tensyon sa Middle East.
Suno sa ahensya, antes pa man nagluntad ang kinagamo sa nasambit nga rehiyon nga nagapamahog nga magpataas sang presyo sang gasolina, yara na sa lugar ang ila fuel subsidy program.
Sa subong, masobra 10,000 ka mga mangingisda gikan sa nagkalain-lain nga rehiyon ang nakabenepisyo sa nasambit nga ayuda.
Agud nga mapadasig ang dalagan sang programa, nagpakig-angot ang BFAR sa Development Bank of the Philippines (DBP) para sa gilayon nga pag-release sang dugang nga pondo.
Sa idalum sang Fuel Assistance Program, ang tagsa ka kwalipikado nga mangingisda ang makabaton sang one-time aid.
Ginapanagtag ini paagi sa cash card ukon voucher, nga gindesinyo agud mangin mahapos ang pagkuha sang bulig, ilabi na sa mga benepisyaryo nga nagapuyo sa mga lugar nga malayo sa mga gasolinahan.
Samtang matapos ang fisheries sector, ginkumpirma sang Department of Agriculture (DA) nga sundon man sang gobyerno ang paghatag sang fuel assistance sa mga mangunguma nga nagasalig sa paggamit sang makinarya sa ila mga ulumhan.
