Nagapadayon ang rice distribution program sang 10 kilos nga bugas sang Capiz Provincial Government nga nagatuyo nga makabulig sa mga poorest of the poor nga pamilya nga naapektuhan sang padayon nga pagsaka sang presyo sang bugas kag iban pa nga nagakinahanglan sang suporta.
Sa interview sang Bombo Radyo kay Atty Luvim Amores, Capiz Provincial Information Officer, iya ginpahayag nga ang programa ang may tinutuyo nga maghatag sang bugas sa mga kwalipikado nga benepisyaryo kaangay sang mga mangunguma, manugpangisda kag mga tricycle driver sa nagkalainlain nga banwa kag siyudad sang Capiz.
Suno kay Amores, first wave pa lang ini sang pagpanagtag kag sa subong padayon ang ila nga paglibot sa kada banwa agud managtag sa kada household.
Pahayag pa niya, wala ini sang pinilian rason nga ang tanan nga deserving nga benepisyaryo ang maka-agum gid.
Nahibaluan nga una na nga napanagtagan sang 10 kilos nga bugas ang banwa sang Sigma, Tapaz, Mambusao kag Dao.
