PRESIDENT ROXAS,CAPIZ – Dismayado ang barangay kapitan sang Barangay Culilang, President Roxas, Capiz kag administrador sang Nemesio Tan Land Holdings Inc, sa pag-award sang Certificate of Land Ownership Award ukon CLOA sa ginasiling agrarian reform beneficiaries sa pagpanguna ni Department of Agrarian Reform ukon DAR Secretary Brother John Castriciones.
Ginpahayag ni punong barangay Ferdinand Bacanto nga wala nasunod ang laye bangud may pending disqualification case pa nga wala madesisyunan ang korte, magluwas pa sa ginakwestyon nga benepisyaryo nga indi kwalipikado.
Suno sa opisyal nga wala ginvalidate ang mga nakabaton sang CLOA sa diin ginsunod sa gihapon ang nagligad nga masterlist kag wala naka-agi sa profiling.
Kadam-an nga yara sa listahan ang indi kilala kag wala nakatalauma sa duta sang pamilya Tan kag madamo na ang nagkalamatay.
Ginapanindugan sang opisyal nga handa ang tagdumalahan sang Nemesio Tan Land Holdings Inc., nga ihatag ang duta sa kwalipikado nga mga farmer-beneficiary.
Ginpahayag pa ni Bacanto nga antes ginpanagtag ang CLOA sa mga farmer-beneficary sa Barangay Dulangan kag Barangay Culilang, nga yara sa masterlist ginhulat kuntani ang desisyon sang korte angut sa naka-pending nga disqualification case nga yara na sa korte.
Suno pa diri nga ano ang mangin disposisyon sang ahensiya sa mga nakabaton sang CLOA kun magpabor sa pamilya Tan ang desisyon sang korte.
