ROXAS CITY, CAPIZ- Preparado na ang Land Transportation Office (LTO) – Roxas City District Office para sa pagpanagtag sang mga plaka sang mga motorista nga pagaumpisahan bwas nga adlaw, Agosto 21 tubtob Oktubre 31, 2025.
Sa interview sang Bombo Radyo kay LTO Roxas City District Office Chief Ma. Lourdes Casipe, iya ginpahayag nga ang pagkuha sang plaka libre apang magdala lang sang nagakaigo nga mga dokumento.
Para sa mga sole owner ukon ang first owner mismo sang unit, magdala sang photocopy sang Official Receipt (OR), Certificate of Registration (CR) kag valid ID. Para naman sa mga ikaduha nga owner sang unit, magdala sang Deed of Sale kag valid IDs.
Magaumpisa bwas nga adlaw ang pagpanagtag sang plaka sa isa ka dako nga mall sa Arnaldo Boulevard, Roxas City takna las 10:00 sa aga tubtob las 4:00 sa hapon.
Ang nasambit nga distribusyon kabahin sang mandato sang ahensya nga taposon ang backlog sang plate numbers kag masiguro nga ang tanan nga mga motorista mahatagan na sang ila madugay nga ginasukot sa amo nga talatapan.
Nahibaluan nga ang mga plaka nga igapanagtag ang umpisa pa sa tuig 2017 tubtob subong nga 2025.
Ginpahayag pa sang opisyal sang Land Transportation Office (LTO) – Roxas City District Office nga ginapreparar na nila ang listahan sang mga benepisyaryo nga makuha sang mga plaka agud nga mapadasig ang proseso.
Interviewed by Bombo Jessa Mae De Los Santos
