Sentro sang programa sang Kahublagan Kontra Kurapsyon sa pagdumdom sang ika-54 nga anibersaryo sang deklarasyon sang Martial Law ang panawagan para sa accountability kag pagpanabat sang mga opisyales nga involved sa alegasyon sang korapsyon.
Sa interview sang Bombo Radyo kay Elmer Forro, Secretary General sang Bagong Alyansang Makabayan-Panay, iya ginpahayag nga importante nga padayon nga panagutan sang mga responsable ang paggamit sang pondo sang gobyerno, ilabi na kon may alegasyon sang pag-abuso ukon iregularidad.
Suno kay Forro, indi lamang dapat magtapos sa imbestigasyon ang mga alegasyon sang korapsyon, kundi kinahanglan nga may klaro nga pagpanabat ang mga indibidwal nga mapamatud-an nga responsable sa pag-abuso sang pondo publiko.
Kaangot sini, ang nagkalain-lain nga grupo sa Panay nagaplano sang mga aktibidad sa Setyembre 21 bilang pagdumdom sang ika-54 nga anibersaryo sang deklarasyon sang Martial Law kag pagsuporta sa mga panawagan para sa accountability, hustisya kag transparency sa gobyerno.
Sa Iloilo City, magapatigayon sang mobilization ang mga grupo kag magamartsa pakadto sa Office of the Ombudsman, samtang sa Roxas City, Capiz, yara sa schedule ang pagtipon kag pagmartsa halin sa Civic Center pakadto sa Roxas City Plaza Bandstand.
Dugang pa sang natungdan, ang Setyembre 21 indi lamang pagdumdom sang Martial Law kundi isa man ka tion para ipabutyag ang panawagan sang publiko para sa mas daku nga transparency kag accountability sa paggamit sang kwarta sang gobyerno.
