ROXAS CITY – Nagapadayon ang aktibidad sang Capiz Electric Cooperative (Capelco) nga pagpang-ilis sa mga daan nga poste ilabi na ang mga gabok kag delikado.
Sa interview sang Bombo Radyo kay Engr. Edgar Diaz, General Manager sang Capiz Electric Cooperative (Capelco) ginpahayag sini nga gina-amat-amat nila nga islan ang mga wood pool sa steel pool.
Suno kay GM Diaz, ang nasambit nga aktibidad sang ahensya wala naga-untat bangud kabahin ini sang ila maintenance.
Aminado man si GM Diaz nga madamo pa sa gihapon nga mga poste ang wala pa na-ilisan bangud suno diri indi basta-basta ang balor sini rason nga ginahimuan nila sang paagi ang mga poste nga mahimo pa mapuslan.
Mahibalun nga nagakinahanglan ang probinsya sang pondo nga P300-M agud ma-islan ang tanan nga mga poste nga daan apang P52-M pa lamang ang ila nabaton buot silingon 20% pa lamang ang ila natigayon nga matapos.
Ginpahayag man sini nga may mga poste nga indi nila gilayon makuha bangud may mga telcos wires nga naka-apid rason agud utdon na lamang ang poste.
Bangud sini, nagpatigayon sila sang paghinala kaupod ang tanan nga mga telcos company sa probinsya agud kasugtanan nga sa tion sang ila aktibidad kinahanglan yara ang ila presensya agud isaylo ini sa bag-o nga poste sang kuryente.
Sa pihak nga bahin, nagnubo na ang pagsuluktan sa kuryente bangud nagnubo ang generation cost subong nga bulan kung sa diin nagnubo ang kwph sang 96 centavos.
Pahayag pa ni Diaz nga mas maganubo pa ang pagsuluktan sa bulan sang Hulyo.
