ROXAS CITY – Matapos ang liwat nga pagpahanugot sa Simbahang Katolika nga paghiwat sang prosisyon sa Biyernes Santo, ginapahanumduman ang mga tumuluo sa ila nakaangdan, nga ginapamatukan sang Simbahan.
Sa interview sang Bombo Radyo kay Rev. Fr. Jose Arturo Emilio O. Arbatin, tagpamaba sang Arkidiyoses sang Capiz kag Kura Paroko sang Sta. Catalina sa Mambusao, suno diri nga ginabawalan sang Simbahan ang pagpangalap sang bulak, ukon ano man nga butang nagikan sa Karo sang imahe sang Santos nga ginprosisyon.
Ini bangud, isa ini ka sahi sang sala nga kinaangdan nga pagpati sang tumuluong Katoliko.
Suno diri, ang importante amu ang pagtuo nga yara sa taguipusuon kag huna-huna, kag wala nasandig sa mga ramos ukon bulak apisar benditado pa ini.
Ang pinaka-importante nga pagpakita sang pagpalangga amu ang pag-upod sa kasakit kag pagkabanhaw ni Ginoong Hesukristo nga manluluwas.
Nagpaalinton man ang Simbahan nga sa karon nga pag-obserbar sang Semana Santa, pangamuyuan ang padayon nga naapektuhan sang giyera sa Ukraine kag Russia, subong man ang mga kandidato kag mangin malimpyo kag malinong nga eleksyon sa Mayo.
