ROXAS CITY – Pagpangamuyo, ini ang nangin bala ni 2LT. Peter Jonas Clores sang tion nga yara ini sa training sang Philippine army.
Sa interview sang Bombo Radyo kay Clores, ginpahayag sini nga sumugod nga ginsulod niya ang pagiging suldado nakaangdan na niya ang masami nga ginabilin sa iya sang iya ginikanan nga indi magkalipat nga magpangayo sang giya kag magpasalamat sa Ginoo, ilabi na sa tion sang kabudlay kag kasubo nga ma-eksperyensyahan.
Suno kay Clores, bata pa lamang siya handum na niya nga magserbisyo sa Pilipinas subong man mangin kaparehas sa iya amay nga isa man ka suldado.
Mahibaluan nga pang-apat sa mag-ulutod si Clores kag apisar malayo sa patag sang suldado ang iya kurso nga tinapusan indi ini nangin sablag sa iya agud untaton ang handum nga mangin kabahin sang Philippine Army.
Aminado man si Clores nga sa una, indi luyag ang iya iloy nga mangin isa siya ka suldado rason nga nagsulod ini sa iban nga trabaho apang bangud kay pursigido ini sa iya katuyuan nga sundan ang iya amay sa pagiging suldado, nagpasimpalad ini sa Maynila agud mag-apply kag didto na nagsugod ang iya karera.
Pahayag man sini nga may mga tion nga nagahebi ini bangud sa kakapoy kag kahidlaw sa iya pamilya apang wala gintugyan na lamang niya ang tanan sa mahal nga maka-ako rason nga nalampuwasan niya ang tanan nga pagtilaw.
Sa karun, masadya si Clores bangud tubtob sa karun daw indi ini makapati nga nasarangan niya ang tanan nga kabudlay nga iya na-eksperyensyahan.
Mensahe sini sa mga kabataan, sundon kag himuon kun anu ang nagapasadya sa ila pag-abot sa pagpangita sa trabaho bangud indi posible ang tanan pag-abot sa mahal nga maka-ako.
