ROXAS CITY – Hugot nga pagpangamuyo kag pagsalig sa kaugalingon ang nangin liyabe agud mapabilin nga positibo sa tion sang pagreview kag makafocus sa pagkuha sang exam.
Ini ang ginpakigbahin ni Ms. Jazelle Hope Villasor CPA Passer sang mainterview sang Bombo Radyo.
Suno kay Villasor, dako nga butang nga makaupod ang iya mga abyan sa tion sang iya nga pagreview bangud na-motivate ini kag wala nagpabaya kag isa man sa iya nangin inspirasyon agud padayunon ang iya nasuguran bangud palarehas lamang ang ila goal nga luyag malab-ot sa isa kag isa.
Pahayag sini nga kaangay man sang iban nga mga examinees nakabatyag ini sang pressure sa kaugalingon kag madamo nga mga pamangkot ang nagasulod sa iya pinsar sa tion nga mapaslawan nga makapasar.
Apang sa pihak sini tanan, wala ini nangin upang agud magtimakas siya kag pamatud-an nga indi mausik ang tanan nga iya ginsakripisyo, ginpulawan subong man ang ginhatag nga suporta kag pinansyal sang iya pamilya.
Mahibaluan nga si Villasor ang tumandok sang Barangay Lucero, Jamindan Capiz ang nagkuha sang kurso nga Bachelor of Science in Accountancy sa Capiz State University Main Campus kag magatapos bilang Cum Laude.
Isa lamang siya sa mapinalaron nga nakapasar bilang Certified Public Accountant (CPA) sa ila lima nga mag-abyan nga nagkuha sang exam sa Baguio City.
Naglab-ot man sa halos lima ka bulan ang iya nangin preparasyon sa pagkuha sang exam kag tuman ang iya pagpasalamat nga nabayluhan ang tanan niya nga pag-antos sang isa ka maayo nga balita matapos nga makapasar.
Dugang pa sini nga matapos niya mahibaluan ang resulta sang exam, nagapalangurog ini kag excited nga ipakigbahin sa iya pamilya.
Nagpalab-ot man si Villasor sang pagpasalamat sa tanan niya nga nangin maestra kag maestro subong man sa iya mga abyan, pamilya nga nagbuylog sa iya sumugod sa iya pag-umpisa tubtob nga nalab-ot ang iya kadalag-an.
