Pagpangawat sa isa ka puluy-an sa Barangay Cagay, Roxas City, padayon nga gina-imbestigaran

Nagapadayon ang imbestigasyon sang mga otoridad sa pagpangawat sa isa ka puluy-an sa Sitio Urban, Barangay Cagay, Roxas City.

Ang nasambit nga balay ginapanag-iyahan ni alyas “Warlito.”

Sa interview sang Bombo Radyo kay Barangay Kagawad Isidro Aragon, iya ginpahayag nga kaagahon natabo ang insidente samtang mahamuok nga nagakatulog ang mga tawo sa sulod sang balay.

Suno kay Aragon, posible nga nagsulod ang kawatan paagi sa bintana matapos makuha ang tatlo ka mga jalousie.

Nakuha sang kawatan ang duha ka cellphone kag isa ka sling bag nga may sulod nga kwarta nga nagabalor sang P1,600.

Samtang, plano naman sang barangay nga magbutang sang duty personnel sa amo nga oras sang kaagahon agud mapabakod ang seguridad kag malikawan amo nga insidente.