ROXAS CITY,CAPIZ-Nagahigpit ang Capiz Electric Cooperative (CAPELCO) sa pag-monitor sang mga konsumidor nga ginadudahan nga nagagamit sang illegal connection ukon nagpangawat sang kuryente, bangud sa padayon nga pag-atubang sang kaso sang pagmanipular sang metro kag pag-bypass sang aktuwal nga konsumo.
Sa interview sang Bombo Radyo Roxas kay Engr. Edgar Diaz, general manager sang CAPELCO, yara sa average 4 tubtob 5 ka consumer kada bulan ang ila na apprehend bangud sa illegal nga pagkonekta sang kuryente. Lakip sa mga pamaagi nga ginagamit amo ang pagbutang sang jumper ukon direct line agud indi mag-agi sa metro ang aktuwal nga konsumo, pag-bypass sang metro, kag pagkakas sang grounding connection sini. Ginahimo ini sang iban agud mapanubo ang ila konsumo nga makita sa metro kag sa ulihi, mapanubo man ang ila binulan nga balayran sa kuryente.
Ginapahayag ni Diaz nga isa sa ginatutukan sang CAPELCO amo ang pag-monitor sa indi normal ukon gulpi nga pagnubo sang konsumo sang isa ka consumer, bangud mahimo ini mangin indikasyon sang illegal connection. May duha ka klase sang power losses—technical loss kag non-technical loss kag ang pagpangawat sang kuryente kabahin sang non-technical losses. Ang mga konsumidor nga nadakpan bangud sini gina penalize kag ginakalkula ang dapat nga bayaran base sa mga natukiban nga paglapas.
Bilang panugyan, gin-athag sang CAPELCO general manager nga dapat maging responsable ang mga konsumidor sa paggamit sang kuryente kag likawan ang bisan ano nga porma sang illegal connection. Paandam ni Engr. Diaz, indi man ini makahatag sang tuman nga pagtipid bangud kon madakpan, mahimo nga balikan ang computation sang konsumo tubtob sa isa ka tuig, nga mahimo mag resulta sa mas daku nga balayran kag penalidad. Mas maayo, suno sa CAPELCO nga legal kag husto ang pagkakonekta sang kuryente agud malikawan ang mas mabug-at nga problema sa ulihi.
