ROXAS CITY – Desidido ang isa ka konsehal sang Sangguniang Panlungsod nga iduso ang ordinansa nga may katuyuan nga matapna ang pagduging sang mga badjao sa syudad sang Roxas.
Ginpahayag ni City Councilor Midelo Ocampo nga isa sa mga rason nga nagtulod sa iya agud mangin kaundan ini sang iya diskurso pribiliyo sang nagligad nga sesyon ang wala sini mauyunan nga aktwasyon kag batasan sang mga badjao, kun indi sila mahatagan sang ila ginapangayuan ukon ginapakilimusan.
Ginpakigbahin sang opisyal ang isa ka insedente nga mismo iya nasaksihan sa diin may isa ka babaye nga may ginauyatan nga duha ka grocery bags sa mga kamot nga nagabantay sang tricycle.
Nagpalapit ang badjao kag nagpangayo, apang nabudlayan ang babaye magkuha sang iya ihatag kag natabuan nga nagpondo na ang tricycle nga iya ginsakyan./
Nakita mismo ni Ocampo ang matalum nga tulok sang badjao sa babaye nga nakasakay na sa tricycle kasunod ang pagbuhi sang tinaga nga apisar wala maintindihan ang iya ginahambal, makapat-ud nga naakig ini bangud wala naghatag ang babaye.
Suno sa konsehal nga wala sini magustuhan ang pagpangayo kayo sang mga badjao, bangud kun indi sila makuntento sa ginahatag sa ila, makabati sang mulay, nagakumod kumod kag ang iban nagapangsakit sa ila ginapangayuan.
Ginpanindugan pa ni Ocampo nga indi siya pabor sa ginahimo sang mga badjao nga pagpakalimos, bangud may iban nga mabakud pa kag mahimo pa nga makatrabaho.
