ROXAS CITY – Hugot nga ginadumilian sang Department of Education (DepEd) Capiz Division, ang pagpangayo sang solicitation ukon pag-inamutay sang kada buluthuan sa mga estudyante kag mga kabataan.
Sa interview sang Bombo Radyo kay Dr. Miguel Apusin Department of Education (DepEd) Superintendent Capiz Division, ginpahayag sini nga kung may yara sang luyag nga mga bag-uhon ukon plano para sa buluthuan ang tagdumala sang eskwelahan ukon mga prinicipals mahimo lamang nila nga himuon, ipresentar ini sa mga ginikanan, alumni, Local Government Units (LGU), barangay kag municipal officials subong man sa gobyerno provincial agud mahinalaan kung anu ang mga masunod nga tikang nga ila kinahanglan himuon.
Ini matapos sa pagtakop sang Brigada Eskwela subong nga adlaw nga Agusto 19, sa diin tion agud magbuylog ang tanan nga mga ginikanan kag mga manunudlo nga tinluan kag kay-uhon ang mga hulot sang eskwelahan para sa liwat nga pagbukas sang klase sa Agosto 29 subong nga tuig.
Suno kay Apusin, wala sang kinahanglan nga amutan ang mga ginikanan sa buluthuan magluwas na lamang kung ang mga ini boluntaryo nga nagahatag sang mga kagamitan nga sarang magamit sang kabataan sa diin bukas sa ila kabubut-on.
Ginpahayag man sini nga may yara sang pondo ang kada buluthuan para sa mga balayaran kaparehas sang kuryente kag tubig apang indi ini supesyente.
Indi man suno diri kinahanglan nga gastuhan ang pagpakay-o sang hulot kundi himuon lamang ini nga simple kag maayo agud ang atensyon sang mga estudyante magapokus sa manunudlo kag sa leksyon.
Tinutuyo lamang sini agud mabuhinan ang kabudlay nga anay na nakaangdan sang mga manunudlo ka gang importante lamang nga ang tanan nga yara sa sulod sa hulot tuman nga mapuslan sang tagsa ka mga estudyante.
Angut sini, preparado na suno kay Apusin ang mga buluthuan apang may yara pa nga mga kulang sa mga hulot ilabi na ang mga dalagko nga mga buluthuan.
