May yara na sang persons of interest ang mga kapulisan sa pagpanghold-up sa isa ka babayi sa Barangay Tacas, Pontevedra, Capiz.
Ang biktima amo si alyas Beth, yara sa legal nga pang-edaron kag residente man sang nasambit nga lugar.
Sa interview sang Bombo Radyo kay Police Captain Dennis Losbañes, officer in charge sang Pontevedra Municipal Police Station, iya ginpahayag nga magapauli kuntani ang biktima halin sa iya tindahan sakay sang tricycle sang hinali lang nga ginbalabagan sang motorsiklo nga ginasakyan sang duha ka lalaki nga naka-itom nga long-sleeve kag pula nga helmet ang biktima pag-abot niya sa ila nga gate.
Suno kay Losbañes,gilayon nga gin-agaw sang backrider ang bag sang biktima nga may unod nga P150,000 antes nagpalagyo sa wala mahibaluan nga direksyon.
Gintinguhaan pa nga lagson sang asawa sang biktima ang nasambit nga motor apang ginaalegar ginpalukpan ini sang backrider.
Sa subong, padayon ang imbestigasyon sang mga otoridad agud madakpan ang responsible sa nasambit nga insidente.
