ROXAS CITY – Hugot nga ginadumilian sang City Agriculturist ang pagpangkuha, pagbaligya kag pagkaon sang mga panginhason matapos nga nagpositibo sa red tide ang pila ka mga banwa sa probinsya.
Sa interview sang Bombo Radyo kay Mary Ann Baria City Agriculturist, ginpahayag sini nga ini isa lamang ka paalinton sa publiko kag wala pa sang mandato nga untatan ang pagpaguha kag pagpasulod sang mga panginhason sa probinsya bangud ginahulat pa ang confirmatory test.
Suno kay Baria, nagpadala na sang water kag meat sample sang nanari-sari nga mga panginhason ang Provincial Agricultural Office-Capiz sa central laboratory sang Bureau of Fisheries and Aquatic resources (BFAR) bilang confirmatory sa ginapahayag red tide sa Capiz.
Isa lamang ini suno diri ka precautionary measure agud indi na madugangan pa ang posible mabiktima sang nasambit nga toxin.
Pahayag pa ni Baria pananglitan magpositibo ang test, magapatigayon sila sang banning sa pagpangkuha, pagbaligya, pagkaon kag pagtransport sang mga shellfish.
Apang kung mangin negatibo naman ang resulta, magapadayon sa gihapon ang ila monitoring tubtob mangin luwas kag mahimo na sa liwat nga makakaon sini.
Mahibaluan nga nagpatigayon sang water sampling ang Capiz Agri-Aqua Laboratory sang damlag kag diri nakit-an nga may yara sang Pyrodinium bahamese ang tubig kung sa diin ini ang nagadala sang Paralytic Shellfish Poisoning ukon red tide.
Panugyan sini sa pumuluyo nga sundon lamang kung anu ang ginapaalinton sang gobyerno probinsyal kag magpati sa ila mga tikang nga ginapatuman.
