ROXAS CITY – Nagapadayon ang pagpatigayon sang imbestigasyon sang Pontevedra Municipal Police Station, angut sa ginaalegar pagpangluthang sa duha ka mga college student sang damlag lang.
Sa interview sang Bombo Radyo kay PCPT. Gregg Anthony Salbang, hepe sang Pontevedra MPS ginpahayag sini nga sa ila pag-imbestiga sa mga biktima antes pa man natabo ang insidente, una na nga may nagpanghaboy sa ila apartment rason agud maguha ang mga ini agud komprontahon ang tawo nga may kahimuan kag gilayon man ini nga nahinalaan.
Apang makaligad ang pila ka adlaw ginkakibot na lamang nanday Romark Restores 22-anyos, 4th year college, residente sang Brgy. Marita President Roxas, Capiz kag si Reneboy Bacero, 22-anyos, 3rd year college kag residente sang Brgy. New Guia Maayon, Capiz ang natabo nga pagpangluthang sa ila samtang nagakaon sa sulod sang ila apartment.
Bangud sa natabo, nag-angkon sang pilas sa wala nga tudlo si Restores kag sa tuo nga tiil naman si Bacero.
Ginpahayag nga isa lamang ka lupok sang armas luthang ang nabatian sang mga estudyante nga nagapuyo sa amu nga apartment.
Suno pa sa hepe, palamangkutanon pa sa karun bangud wala sila sang may narekober nga basiyo sang bala nga gingamit sa pagpangluthang sa lugar sang insidente.
Sa karun, maid-id nga nagapatigayon sang imbestigasyon ang mga kapulisan angut sa insidente kag lunsay yara na sa hilway nga sitwasyon ang mga biktima.
