Nagapadayon ang imbestigasyon sang Roxas Component City Police Station sa pagpangluthang sa isa broadcaster sa Brgy. Cagay, Roxas City.
Ang biktima amo si Jay Lavapiez.
Sa interview sang Bombo Radyo kay Police Lieutenant Colonel Rogelio L. Tomagtang Jr., Officer-in-Charge sang Roxas Component City Police Station, iya ginpahayag nga may nakuha na sila sang mga kuha sang closed-circuit television (CCTV) footage gikan sa barangay nga mahimo makabulig sa pagtumod sang mga suspek.
Suno kay Tomagtang Jr, duha ka tawo ang nakita sa CCTV sa diin ang isa amo ang ginapatihan nga nagpalupok sa salakyan sang biktima, samtang ang isa naman ang nagamaneho sang motorsiklo nga ila ginsakyan.
Sa subong, ginahimo sang kapulisan ang backtracking agud makilal-an kag madakpan ang mga suspek nga nalakip sa amo nga insidente.
