ROXAS CITY – Yara na karon sa estable nga kondisyon ang isa ka pulis nga ginluthang sang ginapahayag anay miyembro sang Philippine Army sa Kilometer 3, Barangay Lawaan, Roxas City.
Mahibaluan nga nakaangkon sang pilas sa kilid sang iya lawas ang biktima nga si Police Corporal Jeorge Catalan, 31 anyos kag residente sang Barangay West Villaflores, Maayon, Capiz kag nagaserbi nga traffic investigator sang Roxas City Police Station.
Nangin madinalag-on ang operasyon sa biktima kun sa diin padayon ini karon nga nagapaayo sa isa ka pribado nga ospital sa siyudad.
Suno sa tiyo sang biktima, nagapati siya nga indi si Catalan ang target sang pagpangluthang kag ini ang naigu gid lamang sang bala bangud wala man ini sang kontra.
Suno naman sa hepe sang Roxas City PNP nga si Lt. Col. Ricardo Jomuad Jr., base sa ila inisyal nga imbestigasyon, nagpadulong si Catalan kaupod ang pakaisa sini nga si JR De Juan sa balay sang ila man pakaisa nga si Wilfredo Dela Cruz para mag-inom.
Samtang nagainom ang mga ini, ginapahayag nga nakabati na lamang sila sang tatlo ka lupok sang armas-luthang kag naigu ang biktima rason nga gindala ini sa ospital.
Samtang, sa ginpatigayon nga hot pursuit operation sang mga kapulisan gilayon naman nila natumod kag nadakpan ang suspek nga si Emerson Taburnal 33-anyos sang Barangay Lawaan, sining siyudad.
Kumbinsido naman si Jomuad nga mistaken identity ang natabo bangud wala naglayo ang dagway ni Catalan kag pakaisa sini nga si De Juan.
Posible suno diri nga ang pakaisa ni Catalan nga si De Juan ang target sang suspek sa pagpangluthang bangud may yara sila sang daan nga hiligut-anon.
Sa karon, nakahunong na sa karsel sang Roxas City Police Station ang nasambit nga suspek kag pagapasakaan sang kaso nga Frustrated Murder.
