ROXAS CITY – Nag-agi sa tatlo ka public hearing antes dalayon ng ginpapasar ang bag-o nga ordinansa sa pletehan sa syudad.
Ini ang ginpahayag ni City Councilor Rey Magallanes, Chairman sang Committe on Public Utilities sang ma-interview sang Bombo Radyo.
Suno kay Councilor Magallanes, nangin kaungdan sang public hearing nga pamatian ang mga suhestyon sang mga commuters, Office of Senior Citizen Affairs (OSCA), Person with Dissability (PWDs) mga estudyante kag madamo pa may kaangtanan sa nasambit nga ordinansa.
Mahibaluan nga sa ila ginpatigayon nga regular session sang Sangguniang Panlungsod kahapon nga adlaw, Mayo 28 natigayon nga mapapasar ang bag-o nga pletehan sa pagsakay sa tricyle kung sa diin ang Regular Rate – P15.00 Student/Senior Citizen/PWDs – (20% Discount) P10.00 Children below 3ft ang height – free ukon wala sang bayad.
Suno diri sa mga magabayular sa nasambit nga ordinansa mahimo nga magabayad sang penalidad nga
1st Offence – P1,500.00
2nd Offence – P3,000.00
3rd Offence – P5,000.00
4TH Succeeding offense/s – Suspension sang Franchise.
Kadungan sini ginpataasan man ang penalidad sa mga magalapas nga tricycle drivers kag mga operators.
Ginpahayag man ni Magallanes nga gamay lamang ini nga adjustment kag kung lantawon suno diri nga sobra na sa 20% ang ginhatag nga discount kung sa diin pabor para sa mga sumalakay.
Nagalaum man ini nga sa pagsugod sang bag-o nga ordinansa, wala na sila sang may mabaton pa nga mga reklamo may kaangtanan sa pagsuluktan sa mga pasahero.
