Pagapalig-unon ang kampanya batok sa kriminalidad sa Roxas City sang bag-o nga hepe sang Roxas Component City Police Station nga si Police Lieutenant Colonel Rogelio Tomagtang Jr., para mapabakod ang seguridad sa syudad.
Sa interview sang Bombo Radyo Roxas kay Tomagtang iya ginpahayag nga prayoridad niya ang pagpasangkad sang crime prevention programs paagi sa mas mabaskog nga police visibility, padayon nga mobile kag foot patrols, checkpoint operations, kag hugot nga koordinasyon sa mga barangay, force multipliers kag iban nga government agencies.
Suno sa iya, importante ang aktibo nga partisipasyon sang komunidad agud mapunggan ang kriminalidad antes pa ini matabo.
Dugang pa sini, padayon nga tutukan sang Roxas City Police Station ang kampanya batok sa iligal nga droga, loose firearms, wanted persons kag iban pa nga mga paglapas sa layi. Ginpabutyag ni Tomagtang nga ang padayon nga intelligence-driven operations kag police response isa sa mga tikang agud mapabaskog ang peace and order sa syudad.
Lakip man sa mga prayoridad sang bag-o nga hepe ang pagmintinar sang seguridad sa mga eskwelahan pinaagi sa regular nga pagdeploy sang mga kapulisan sa klase, ilabi na sa mga eskwelahan nga may madamo nga populasyon sang estudyante nga kabahin sang preventive measures agud malikawan ang mga untoward incidents kag masiguro ang kaluwasan sang mga estudyante, manunudlo kag ginikanan.
Nagpanawagan naman ang natungdan sa publiko nga magpadayon sa pagkooperar sa kapulisan paagi sa pagreport sang mga indi normal nga aktibidad kag pagsuporta sa mga programa sang PNP.
