Padayon nga ginaduso ang paggamit sang teknolohiya agud mas hugot nga mamonitor ang paggamit sang pondo sang gobyerno, ilabi na sa tunga sang mga pagbaha nga nagaapekto sa nagkalain-lain nga bahin sang pungsod.
Ginapanawagan nga mapasar na ang proposed bill ni Sen. Bam Aquino nga Citizen Access and Disclosure of Expenditures for National Accountability ukon CADENA Act.
Nakuha man sini ang suporta sang aktor nga si John Arcilla, nga kilala sa iya papel bilang Heneral Luna, nga padayon nga nagapanawagan para sa pagpapasar sang amu nga hagna.
Ginahimuan man niya sang panawagan ang iban pa nga online media personalities nga suportahan ini, bangud sa pagpati nga ang blockchain technology makabulig sa pagpatuman sang transparency kag accountability sa paggasto sang pondo sang pungsod.
Sa idalom sang CADENA Act, ginamanduan ang tanan nga ahensya sang gobyerno nga mag-upload kag regular nga mag-maintain sang detalyado nga mga dokumento nga may kaangtanan sa budget sa isa ka Digital Budget Platform.
Luyag sang proposed bill nga makapatukod sang isa ka sistema nga masiguro nga accessible sa publiko, open-source, kag masubaybayan ang mga dokumento kag transaksyon nga may kaangtanan sa paggasto sang pondo sang gobyerno.
Magluwas sa aktor, madumduman nga nakakuha na man sang suporta ang hagna halin sa nagkalain-lain nga personalidad kag mga sektor sa industriya.
