Paga-umpisahan na ang proyekto sang pagpasemento sang isa ka lokal nga dalan ukon Provincial Road sa Barangay Aglanot, Dumarao, Capiz, nga ginapatuman sang Provincial Government of Capiz sa idalom sang liderato ni Governor Fredenil H. Castro.
Tinutuyo sang proyekto nga mapauswag ang dalan agud mangin mas hapos, hilway kag komportable ang pagbiyahe sang mga pumuluyo, ilabi na ang mga estudyante, mamumugon, negosyante kag mangunguma.
Paagi sa pagpasemento sang dalan, ginalauman nga mangin mas mahapos man ang pagdala sang mga produkto halin sa mga uma pakadto sa merkado.
Magabulig man ini sa mas mahapos nga pagbiyahe sang mga kabataan pakadto sa eskwelahan kag sang mga pumuluyo pakadto sa mga sentro sang ikaayong lawas, trabaho kag iban pa nga importante nga lugar.
Ginalauman man nga mapanubo sini ang oras kag kabudlayan sa pagbiyahe, labi na kun mabaskog ang ulan nga nagapabudlay sa pag-agi sa dalan.
Ang proyekto ginpondohan paagi sa Local Government Support Fund–Financial Assistance to Local Government Units (LGSF-FALGU).
Suno sa Provincial Government indi lamang ini pagpaayo sang dalan kundi isa man ka tikang sa pagpalig-on sang koneksyon kag oportunidad sa komunidad.
Paagi sa mas maayo nga dalan, ginalauman nga mag-uswag ang lokal nga ekonomiya kag mangin mas episyente kag matawhay ang pangabuhi sang mga pumuluyo.
