ROXAS CITY -Preparado na ang Simbahang Katolika sa probinsiya sang Capiz pag-abot sang mga pagsulundan nga igapatuman sa maabot nga pag-obserbar sang undas subong nga tuig.
Sa interview sang Bombo Radyo sa kay Fr. Jose Arturo Emilio Arbatin, Head sang Social Communication and Mass Media sang Archdiocese of Capiz ginkompirmar sini nga nagpapanaog sang Memorandum Circular si Msgr. Jose F. Advincula, ang arsobispo sang Capiz sang mga pagsulundan nga igapatuman sang simbahang katolika sa maabot nga undas.
Suno sa kay Arbatin nga sandig sa ginpapanaog ni Advincula nga Circular No. 27 series of 2020 nga na petsahan sang Oktubre 14, 2020, ginapahayag sini nga pagasiraduhon ang tanan mga pribado kag pampubliko nga sementeryo kalakip na ang mga memorial parks kag columbariums humalin Oktubre 29 tubtob Nobyembre 4 sini nga tuig.
Sandig ini sa ginkasugtan sang Inter-Agency Task Force (IATF) sang tinalikdan nga bulan sang Setyembre.
Apang ginklaro ni Arbatin nga mahimo pa nga makabisita sa mga patyo ang mga tumuluo antes kag pagkatapos sang nasambit nga adlaw.//
Hugot man nga ginadumilian ang pagpatigayon sang mga misa kag pagbendesyon sa sulod sang patyo.
Apang ginklaro sini nga may yara sang misa nga pagahiwaton sa mga simbahan, mission stations, barangay chapels kag iban, apang igapatuman sa guihapon ang mga mininum health protocols.
Magluwas diri, mahimo man nga makalantaw sang misa ang mga tumuluo pinaagi sa online partikular na sa Facebook.
Samtang mahimo man nga ihulog sa mga ginpahamtang nga mga drop boxes sa kada simbahan ang offering kag ngalan sang ila nagtaliwan nga mga himata nga luyag nila nga pangamuyuan.
Hugot naman nga ginadumilian sa mga kaparian nga magpatigayon sang mga aktibidadis nga mahimo makaganyat sang mga damo nga tawo.//
Ang mga nasambit nga tikang suno sa kay Arbatin ang kabahin gid lamang agud malikawan ang pagdugok sang mga tawo sa mga patyo nga posible tunaan sang paglapta sang virus.
