ROXAS CITY – Ginatun-an sang Department of Agriculture ang pagpabaskog sa production kag marketing sang ahos sa bug-os nga pungsod.
Suno kay DA Undersecretary Cheryl Marie Natividad-Caballero, daku ang potensyal sang garlic production sa Pilipinas.
Ginpaanggid ni Caballero ang Ilocos garlic nga suno sa iya nagustuhan sang iban nga mga pungsod sa pihak sang magagmay sini nga size.
Pahayag pa sang DA official, nagadihon na sang nagakaigo nga programa ang DA agud masuportahan kag mapreserbar ang garlic heritage sang Ilocos nga ginatawag anay bilang ‘Ilocos white gold’.
Sandig sa datos sang Philippine Statistics Authority(PSA), ang garlic production sang pungsod ang 2.6% lamang sang tuigan nga demand nga 146,879 metriko tonelada kun sa diin ang mga probinsya sang Ilocos Norte, Nueva Ecija, kag Batanes ang nagapanguna nga producer.
Suno kay Caballero, ginmanduan na ni Agriculture Sec. Francisco Tiu Laurel Jr. ang regional offices sang DA sa Northern Luzon, ilabi na sa Cagayan Valley agud magbakal sang madamo nga planting materials sang Ilocos garlic kag itanom ang mga ini pag-abot sang Setyembre.
Target suno diri sang DA nga mapasaka ang production sang ahos sa bug-os nga pungsod kag malab-ot ang 20% nga domestic production tubtob sa masunod nga tuig.
