ROXAS CITY – Ginklaro sang Chairman sang Committee on Environment sang Sangguniang Panlalawigan nga indi sang interes sang provincial board ang pagpatawag sa mga resource persons nga magtambong sa ila nga session agud magtalakay sang pondo para Annual Budget sa tuig 2020.
Ini ang ginpah ayag ni Board Member Mateo Hachuela sang mainterview sang Bombo Radyo.
Suno kay Hachuela nga para ini sa interes sang mga pumuluyo sang probinsya sang Capiz ilabi nagid sang mga indibidwal nga nagakinahanglan sang serbisyo natuhoy sa ikaayong lawas kag pagtatap nagikan sa government ospitals.
Bangud sa wala pagtambong sang mga department heads, chief of hospitals kag iban pa agud mangin resource speakers, sa gihapon magahatag sang kahigayunan ang Sangguniang Panlalawigan nga makatambong ang mga ini bangud wala pa matapos ang annual budget para sa tuig 2020.
Apang sa tion nga indi pa magtambong ang mga resource persons may posiblidad nga indi pag-ipapasar sang Sangguniang Panlalawigan ang Annual Investment Plan (AIP) para sa tuig 2020.
Bangud nagapakita lamang ini nga wala sang respeto sa provincial board ang nasambit nga mga resource persons.
