ROXAS CITY-Nangin generally peaceful ang pagpatigayon sang simbang gabi kag pagselebrar sang paskuwa sa probinsiya sang Capiz.
Ini ang ginpahayag sang Provincial Director sang Capiz Police Provincial Office ukon CPPO sang mainterview sang Bombo Radyo Roxas.
Sa interview sang Bombo Radyo Roxas sa kay Police Colonel Julio Gustilo Jr., ginpahayag sini nga wala sang mga dalagkuan nga insidente nga nagkahinabo sa sa probinsiya sa tion sang pagpatigayon sang simbang gabi kag pagselebrar sang paskuwa.
Magluwas gid malang sang pila ka mga magagmay nga mga insidente nga ginka-imbolbaran sang mga indibidwal nga yara sa idalom sang impluwensiya sang makahulubog nga ilimnon.
Partikular nga gintumod sang opisyal ang natabo sang pagpanglabo sa banwa sang Ivisan kag Barangay Banica, kag pagpangbuno sa Barangay Cagay sining siyudad.
Ginkalipay naman ni Gustilo nga mas malinong kag matawhay ang pagpatigayon sang amo mga aktibidadis kun ikumpara sang tinalikdan nga tuig.
Samtang sa pihak nga bahin, dako ang pagsalig ni Gustilo sa mga kapulisan sa probinsiya nga indi ini sila matintar kag magpalupok sang ila nga armas-luthang sa pagsugalaw sang bag-ong tuig.
Suno sa opisyal nga indi na pagbutangan pa sang muzzle tape ang mga service firearms sang mga kapulisan.
Dugang pa ni Gustilo nga mga mature na kag nakaintindi na ang mga kapulisan sa mga konsekwensiya sa tion nga magapalupok sila sang ila armas-luthang.
