ROXAS CITY – Nagdihon sang petition letter ang mga residente sang Barangay Tanque, sining syudad agud ipakita ang pagpamatuk sa plano nga pagpatindog sang cell site sa ila nga barangay sang DITO telecommunications company.
Kapin sa 73 ka mga indibidwal ang nagpirma sa nasambit nga petition letter nga ginpalab-ot kay Kapitan Herminia Dillo sang Barangay Tanque, agud makita sang opisyal ang rason sang mga residente sa ila pagpamatuk sa nasambit nga tikang.
Ginpahayag ni Engr. Anthony Vicente Jr., bisan ano ang matabo, indi ini magpasugot nga makapatindog sang cell site nga malapit sa ila balay, bangud makaapekto ang radiation sa ikaayong lawas sang tawo.
Ginpanindugan man sini nga wala sila sang nabaton nga notisya para magtambong sa public hearing agud makapalayag man sila sang ila opinyon angut sa nasambit nga isyu.
Nagpakig-angut man si Vicente sa City Engineer’s Office sa diin nahibaluan sini nga wala sang may gin-aprubahan nga permit ang talatapan nga pagpatindog sang cell site sa Barangay Tanque, kundi ang request lamang sa ila amo ang espasyo nga patindugan sang ila generator kag container van.
Apang ginpalab-ot sa tagreklamo nga indi mahimo nga mapahanugutan nga makapatindog sang cell site sa residential area.
Aminado si Vicente nga may benepisyo nga makuha ang barangay sa pagpatindog sang cell site apang halit ang dala sini sa mga pumuluyo nga mabutang sa peligro ang ikaayong lawas kag kabuhi.
