ROXAS CITY — Ginapaiway anay ni Capiz Governor Esteban Evan Contreras II ang implementasyon sang Household Quarantine Pass (HQP) system sa probinsiya tubtob nga indi pa preparado ang mga lokal nga gobyerno sa siyudad kag kabanwahanan nga ipatuman ini.
Sa Section 9 sang gin-isyu nga Memorandum Order No. 43 Series of 2020 sang gobernador, ginpanugyan niya sa kapulisan nga ipaiway anay ang istrikto nga implementasyon sang HQP system sandig sa iya gin-isyu nga Executive Order No. 12 series of 2020 nga nagapaidalum sa probinsiya sa enhanced community quarantine bangud sa napagkit nga kaso sang coronavirus disease 2019 (COVID-19) sa banwa sang Jamindan.
Sa iya memorandum order, ginatugyan na ni Contreras sa mga lokal nga gobyerno sa siyudad kag mga kabanwahanan ang pag-isyu sang HQP sa mga residente.
Ginabilin na man niya sa mga lokal nga gobyerno ang pagtalana sang petsa kun san-o nila ini istrikto nga mapatuman.
Ang HQP libre nga iga-isyu sang punong barangay sa isa ka katapo sang panimalay nga gindesignar agud maghikot sang ila mga kinahanglanon sa tion sang enhanced community quarantine kaangay sang pagpamakal sang pagkaon kag iban pa nga basic kag essential commodities kag paghimo ukon pagtambong sa mga importante nga hilikuton sa guwa sang ila mga panimalay.
Kinahanglan nga ang nagahawid sang HQP ang indi sang masakiton, bata, tigulang, person under investigation (PUI) ukon person under monitoring (PUM) bangud sa COVID-19, kag nagakadapat nga yara sa maayo nga kundisyon ang ikaayong lawas sini.
Kinahanglan man nga mag-designar sang alternate ang isa ka panimalay nga mahimo maghawid sang HQP sa tion sang emerhensiya kun sa diin wala ang rehistrado nga holder sang dokumento.
Samtang mahimo nga mamultahan kag makansela ang HQP sang nagahawid sini pananglitan maglapas sa gin-isyu nga guidelines sang probinsiya.#
