Ginaplano sang Sangguniang Panglungsod ang pagpatuman sang Speed Limit Ordinance sa syudad sang Roxas.
Sa interview sang Bombo Radyo kay Roxas City Councilor Fernando Luis ‘Bords’ Viterbo, iya ginpahayag nga tinutuyo sang nasambit nga plano, amo ang masiguro ang seguridad sang mga pumuluyo, mga pedestrian ilabi na ang mga motorista.
Suno kay Viterbo, gina-request ni Mayor Ronnie Dadivas nga magpatuman sang 40 kilometers per hour nga speed limit sa may bahin sang Arnaldo Boulevard, Barangay Baybay kag Barangay Dayao, Roxas City kun sa diin madamo sang mga motorista ang madasig magpadalagan.
Gin-athag man ni Veterbo nga antes nila nga ipatuman ang amo nga ordinansa, magapatigayon anay sila sang dry run.
Lakip na ang pagbutang sang mga CCTV cameras nga may artificial intelligence agud madasig nga ma detect ang motorista nga magalampas sa gintalana nga speed limit.
Pahayag pa niya, magapatuman man sila sang penalidad sa mga magalapas sa amo nga ordinansa.
Sa subong, pending pa sa second reading ang amo nga ordinansa kag magapatigayon pa sang public hearing sa masunod nga semana.
