ROXAS CITY – Temporaryo nga ginpauntat ang pagpailaw sang Panay Christmas Village sa Barangay Poblacion Ilaya, Panay, Capiz.
Ini ang ginkumpirmar ni Police Captain Christian Mahometano, hepe sang Panay Municipal Police Station sang mainterview sang Bombo Radyo Roxas.
Suno kay Mahometano, nagpatigayon sang sinapol ang Local Government Unit (LGU)sang nasambit nga banwa kaupod ang mga kapulisan kahapon nga adlaw kag nadesisyonan nga humalin alas 10 na lang sa gab-i ang pagpasiga sa Christmas Village.
Ini agud indi na magpadulong ang mga nagabisita nga nagikan sa iban nga mga kabanwahanan bangud sa pagsunod man sa curfew hours.
Dugang pa sini nga madamo sila sang nabaton nga reklamo humalin sang ginbuksan ang pagpailaw kapareho sang wala pagsunod sa mga ginapatuman nga minimum health protocols.
Gani, wala man nagauntat ang mga kapulisan sa pagrekorida agud magpahanumdom sa pila ka mga nagalapas sa quarantine protocols apisar nga aminado ini nga indi makaya sang mga pulis nga bantayan ang nagabisita.
Suno diri nga apisar ginpatay sang temprano ang mga pailaw apang madamo sa gihapon ang nagapabilin sa lugar agud magpakuha sang laragway.
Samtang kadungan sang temporaryo nga pagpauntat sang pailaw sa Panay Christmas Village sa amo nga banwa nagtuga naman ini sang nagkalain-lain nga mga reaskyon sa mga tawo.
Suno kay Art Bering sang Barangay Candual sang amo nga banwa, pabor ini sa nangin desisyon sang mga opisyal bangud pamaagi sini nga mahagan-hagan ang pagkadto sang mga tawo sa lugar kag malikawan nga malatnan sang COVID-19.
Ginpahayag sini nga mas maayo nga magsunod na lamang sa ginapatuman nga mga minimum health protocols agud malikawan man ang pagdamo sang kaso sang amo nga balatian.
Samtang, dismayado naman ang isa ka pumuluyo nga taga Barangay Quios banwa sang Panitan bangud sa gulpihanay nga pagpauntat sang pailaw.
Suno diri nga nagbiyahe pa ini agud masaksihan ang kaanyag sini sa labing-una nga tinion apang wala ini nagalaum nga ipauntat kagab-i.
Dugang pa sini nga naggasto gid ini sang gasolina agud lamang masaksihan ang Panay Christmas Village.
