ROXAS CITY – Isa ka peke kag palpak nga modernasasyon ang ginaduso nga pagphase-out sa mga daan nga salakyan agud bayluhan sang mga imported nga mini bus.
Ini ang nangin pahayag ni Mr. Elmer Forro Secretary General Bayan Panay sang ma-interview sang Bombo Radyo.
Suno kay Forro, indi kinahanglan nga dulaon ang daan nga mga salakyan agud palabihon ang imported nga mini bus bangud isa ini sa mga ginakabig nga nangin kasaysayan sang Pilipinas.
Sa pagahiwaton nga ika-duha nga State of the Nation Address (SONA) ni Presidente Ferdinand ‘Bongbong’ Marcos Jr., magapatigayon ang transport group sang untat-byahe agud magrally kag ipalab-ot kag ipahibalo ang ila mga hibubun-ot angut sa ginaduso nga modernization.
Mahibaluan nga ang pagphase-out sang traditional jeepneys kag
mandatory nga consolidation sang prankisa bilang kabahin sang PUV Modernization program sang gobyerno ang rason sang ginaplano nga 3 ka adlaw nga untat-biyahe sang pila ka transport group sa Lunes, Hulyo 24 ukon sa mismo nga adlaw sang SONA ni PBBM.
Ginpunto man ni Furro nga ang mga opsiyal sang gobyerno kag dalagko lamang nga korporasyon ang magapulos sa nasambit nga mini bus kag indi ang publiko.
Pananglitan nga mapatuman ini, indi lamang ang mga operator suno kay Furro ang magapanghakroy kundi subong man ang mga sumalakay bangud ginapahayag nga magasukot ini sang P30.00 tubtob P40.00 nga pamasahe.
Apisar nga ginapasiguro sang Land Transportation Franchising and Regulatory Board (LTFRB), nga matabo pa ini sa duha tubtob tatlo ka tuig, kinahanglan sa gihapon suno diri nga tun-an kag indi pagdalaion.
