Nagalaum si Senate Majority Leader Francis Tolentino nga mapalig-on sang duha ka bag-o nga layi ang pagkilala sang international community sa kinamatarong sang pungsod sa teritoryo partikular na sa West Philippine Sea (WPS).
Kaangut sini ginakabig ni Tolentino nga madinalag-on para sa kada Pilipino ang pagpirma ni Pangulong Bongbong Marcos sa duha ka bilidhon nga layi, ang Philippine Maritime Zones Act ukon Republic Act 12064 kag Archipelagic Sea Lanes Act ukon Republic Act 12065.
Nagapati ang senador nga ang pagpasalayi sa duha ka nasambit nga hagna ang magapasangkad sa pagkilala sang international community sa pagpakigbato sang Pilipinas sa mga kinamatarong, subong man sa opisyal nga pagkilala sa ‘West Philippine Sea’ sa global maritime and aviation systems.
Una na diri, ginkalipay ni Tolentino ang pagpasalayi sa mga ini nga mas labi nga nagapabakod sa integridad sang teritoryo sang Pilipinas kag sa mga obligasyon kag kinamatarong sang pungsod sa tanan nga nasakupan nga maritime zones kalakip na ang West Philippine Sea.
Ginsiling ni Tolentino nga ang amu nga mga layi ang magaserbe nga implementasyon sang makasaysayan nga 2016 Hague Arbitral Ruling nga nagpabor sa Pilipinas sandig sa United Nations Convention on the Law of the Sea (UNCLOS).
