Tinutuyo sang Ordinance No. 013-2026 nga maproteheran ang mga manugbaligya kag mapahagan-hagan ang ila ginapas-an nga gastos paagi sa pag-postpone sang pagtaas sang rental rates sa Teodoro Arcenas Trade Center (TATC).
Sa interview sang Bombo Radyo kay City Councilor Fernando Luis Viterbo, iya ginpahayag nga ginpasar sang Roxas City Council ang ordinansa bangod sang padayon nga epekto sang energy crisis kag kabudlay sang pagnegosyo.
Paagi sini, ang plano nga pagsaka sang renta nga dapat tani ipatuman subong nga tuig, ang temporaryo anay nga ipaiway tubtob 2027.
Suno kay Viterbo, indi gilayon nga ipatuman ang pagtaas sang renta bangod ginplano ini nga himuon paagi sa staggered implementation tubtob 2029 agud indi mabug-atan ang mga vendors kag manugbaligya sa merkado.
Pahayag pa niya, ang ini nga tikang sang Roxas City Government ang may tinutuyo nga mabuligan ang pag-stabilize sang presyo sang mga basic goods kag commodities.
Ginpasiguro man sang natungdan nga pagatutukan pa gid sang Roxas City Government ang mga isyu sa TATC agud masiguro ang matawhay nga pagbaligya sang mga vendors kag maayong serbisyo sa mga pumuluyo nga naga bakal sa merkado.
