ROXAS CITY – Ginakabig sang mga otoridad nga ‘isolated case’ ang natabo nga pagran-amok, pagpanghostage kag pagpangluthang sang isa ka Thai soldier sa mga mall-goers sa Korat, Thailand.
Ini ang base sa report sa Bombo Radyo Roxas ni Bombo International Correspondent Cleo Rose Jondonero.
Suno diri nga nagdangat na sa 35 ang patay samtang 63 naman ang padayon nga ginabulong sa ospital tuga sang pagpangluthang sang suspek nga si Jakraphanth Thomma, 32 anyos nga ginapahayag isa ka ‘sharp-shooter’.
Mahibaluan nga naglab-ot sa halos 16 oras ang pag-hostage sang suspek sa mga biktima antes ini nakit-an sang mga pulis kaupod ang walo ka mga hostages nga ang iban ang pilason.
Armado ang suspek sang granada kag HK33 assault rifle nga amo ang gingamit sini sa pagpangluthang sa sinuman nga tawo nga iya makit-an sa guha kag sa sulod sang nasambit nga mall.
Suno kay Jondonero, kilala ang mga Thai nga ‘peace-loving people’ gani ginkakibot gid sang tanan ang nasambit nga insidente ilabi pa nga natuonan man ini sa Makha Bucha celebration sang amo nga pungsod.
Sa karon talalupangdon ang malaka nga tawo nga nagalagaw sa mga pampubliko nga lugar kasunod sang amo nga insidente.
Tuman nga ‘trauma’ naman ang natuga sang nasambit nga hitabo sa mga nakaluwas kalakip na ang anom ka mga Pinoy nga nagpanago sa sulod sang fitting room kag nakaguha lamang sang makaabot na ang rescue team.
