ROXAS CITY – Nakasandig na sa Munisipyo kag Barangay ang paghimo sang polisiya sa pag-isyu sang household quarantine pass.
Ginpabutyag ni Capiz Governor Esteban Evan Contreras nga ang tagsa ka banwa ukon barangay ang dapat magdihon sang pamaagi kun paano mapatuman ang nakasaad sa Memorandum Order no. 43-2020 nga nagatalana sang pagsulundan angut sa pag-isyu sang nasambit nga quarantine pass.
Gindugang pa sang gobernador nga bangud nakita sini nga may pila ka mga gobyerno lokal ang indi pa preparado sa pagpatuman sang nasambit nga mandu, ginpakamayo sini nga ipaiway lang anay ang pag-obligar sa mga pumuluyo sa pagpresentar sang quarantine pass tagsa magguwa ang mga ini sa ila panimalay.
Daku man ang pagpasalamat sang gobernador sa madasig nga pag-akto sang iban nga mga LGU kag barangay bangud gilayon nga nakahimo ang mga ini sang pamaagi para makahatag sang pases sa ila mga residente
Gintumod sang gobernador ang pila ka mga kabarangayan sa banwa sang sigma nga suno diri amo ang madasig nga nakadihon kag nakapanghatag sang household quarantine pass sa ila mga pumuluyo.
Sandig sa memorandum order no. 43 series of 2020 nga ginpagguwa ni Capiz Governor Esteban Evan Contreras II sang Marso 25, 2020, ginatugyan sa lokal nga gobyerno lokal ilabi na gid sa kabarangayan ang pag-isyu sang household quarantine pass nga may yara sang selyo sa probinsiya, banwa kag barangay.
Nakadetalye sa nasambit nga dokumento ang pangalan kag edad sang holder, subong man ang control number kag pirmado sang Barangay Kapitan.
