Nagapanawagan si Senator Erwin Tulfo sa iya mga kaupod sa Senado nga dasigon ang pagrepaso sang Oil Deregulation Law, kasunod sang padayon nga pagtaas sang presyo sang gatong bangud sa nagapadayon nga gyera sa Middle East.
Suno kay Tulfo, apektado gid ang mga Pilipino sa nagapadayon nga problema bangud limitado ang gahum sang gobyerno sa pagkontrol sang presyo sang produktong petrolyo.
Ginpahayag niya nga sa idalom sang nagapadayon nga sistema, ang gobyerno mahimo lang mag-apelar sa mga oil companies nga indi magtaas sang sobra ang presyo kun magtaas man ang balor sang gatong sa global market.
Dugang sini, ginsuportahan ni Tulfo ang ginpasa nga Senate Bill No. 641 ni Senator Sherwin Gatchalian ukon ang pag-institutionalize sang transparency sa Philippine downstream oil industry, nga nagatuyo nga repasuhon ang RA 8479.
Ang amu layi nagatuyo nga ipakita ang “unbundled prices” ukon detalyado nga breakdown sang presyo sang mga kumpanya sang gatong agud mangin klaro sa publiko ang presyo.
Gindugang man ni Tulfo ang ginahambal nga overpricing sa mga produktong petrolyo nga ginabakal sa mga gasolinahan, kag ginpahayag niya nga panahon na para ipatuman ang layi nga magapilit sa mga kumpanya sang langis nga ipakita ang aktwal nga costing sang ila produkto.
Samtang, ginpahayag man sang senador nga dugay na nga panawagan sang transport sector ang pagrepaso ukon pagbag-o sa nasambit nga layi.
