ROXAS CITY – Indi pa makahatag sang ensakto nga petsa ang principal II sang Barra Elementary School kun san-o magaresume ang klase, kasunod sang insedente nga pagkahulog sang bato sa amo nga eskwelahan.
Ginpahayag ni Mrs.Pia Bengan Lee nga wala pa sang pat-ud nga adlaw kun san-o maga-resume ang klase kag ila pa ginahulat ang panugyan sang Roxas City School Division office.
Ginsuspende ang klase subong nga adlaw bangud nabalaka ang talatapan nga mahulog ang nabilin pa nga mga bato nga yara nahamtang sa naibabaw nga bahin sang eskwelahan.
Suno kay Lee nga sandig sa instruksyon ni Dr. Feliza Beriong, Roxas City schools division superintendent nga hulaton lamang ang abiso sang division office bangud magahimo sila sang rekomendasyon nga igaba-se sa mangin assestment.
Nagpasalig man si Mayor Ronnie Dadivas sa ila nga paghinun-anon nga magapadala sang inhenyero sa City Engineer’s Office nga maga-asses sa sitwasyon sa eskwelahan.
Samtang nagdepensa naman si Lee angut sa wala pagsabat sang ginpangayuan sang pauna nga statement sang Bombo Radyo kasunod sang insedente./
Suno sa principal nga nagasunod lamang ini sa protocol nga antes magpost sa social media ukon magpaguwa sang pahayag, kinahanglan nila nga pahibaluon ang ila division office kag siguraduhon nga ensakto ang mga impormasyon nga ila gina-relay sa media.
