ROXAS CITY -Nagpaguwa sang official statement sa Facebook si City Mayor Ronnie Dadivas natuhoy sa ginapahayag pagbato sang mga naka quarantine nga mga OFW repatriates sa mga frontliners sa Hortus Botanicus Barangay Milibili, Roxas City.
Base sa post ni Mayor Dadivas nga wala sini nauyonan ang ginpakita sang mga naka quarantine nga mga repatriates nga paglapas sa ginapatuman nga house rules sang nasambit nga pasilidad.
Gindugang pa ni Dadivas nga igapatuman sini ang ‘full force of the law’ sa mga retobato nga mga repatriates para mapasiguro nga hilway sa COVID-19 ang bilog nga siyudad.
Samtang ginkadismaya man ni City Health Officer Dr. Lory Cahilog ang ginpakita nga pamatasan sang mga naka quarantine nga mga repatriates sa nasambit nga pasilidad.
Suno sa kay Cahilog nga ginlapas sang mga repatriates ang House Rules nga ginapatuman sang nasambit nga pasilidad.
Ginpanindugan sini nga indi pagpasugtan sang city government nga makaguwa sa quarantine facility ang mga repatriates nga natapos na ang 14-day quarantine apang wala pa nakaguwa ang resulta sang RT-PCR test.
Mahibaluan nga kalakip sang mga ginareklamo sang mga repatriates amo ang padayon nga pagsulod sang mga repatriates sa quarantine facility nga wala pa na swab test, mahinay nga pag-paguwa sang result sang RT-PCR test, natapos na ang 14-day quarantine sang mga ginaquarantine apang indi pa pagpaguwaon bangud wala pa nag-abot ang resulta sang test, kag ang mga repatriates ang nagalimpyo sa ila mga hulot.
