ROXAS CITY – Isa ka open letter ang ginpadala sang isa ka miyembro sang Sangguniang Panlalawigan sa gobernador sang probinsiya sang Capiz.
Kaundan sini ang pag-apelar kay Governor Esteban Evan Contreras II nga pagrecall ukon pagrevoke sa appointment ni Dr. Edwin Monares bilang provincial administrator sang probinsiya.
Napagkit diri ang mga rason nga nagtulod sa tagsulat nga maghimo sang open letter sa gobernador matapos nakita nga unfit fit ukon indi nagakabagay sa posisyon bilang provincial administrator si Monares.
Gintuad pa nga sa iya nga pagsulod sa pulitika, ginakabig na sini ang kaugalingon nga loyal supporter sang gobernador.
Sa pihak nga indi sila magkapartido, apang suportado sini ang legislative agenda ni Contreras, bangud nagapati ini sa sinseridad sang gobernador nga makadala sang pagbag-o kag progreso sa probinsiya.
Ginklaro man sini nga indi ang ila pagparyentihanay ang rason nga nagsuporta kay Contreras kundi ang pagsalig sa kapabilidad sang gobernador nga makadala sang pagbag-o kag paglaum sa kabuhi sang mga Capizeños.
Apang ini nga dalamguhanon nabayluhan sang kasubong isa ka malain nga damgo.
Ini bangud sa sala nga desisyon sa pagpili kay Dr. Edwin Monares bilang provincial administrator.
Sa baylo nga mangin asset si Monares sang administrasyon, nangin liabilidad pa ini, bangud sa iya mga aksyon nga naghatag sang negatibo nga imahen sa management style bilang gobernador sang probinsiya.
Partikular nga gintumod sang lettersender nga ginmantsahan ni PA Monares ang talatapan sang gobernador kalakip ang pangalan sang ila pamilya nga nagresulta sa pagkadula sang trust and confidence sini sa liderato sang karon nga administrasyon.
Ginapanindugan pa sang tagsulat nga unfit si Monares nga mangin provincial administrator bangud sa indi maayo nga pagbinatasan, kakulang sang administrative skills kag ang kapaslawan nga maka-connect kag develop sang maayo nga relasyon sa tunga sang Sangguniang Panlalawigan kag Office of the Governor, arogante kag indi pagbaton sang kasal-anan sa diin masami ginabasol ang iban sa iya mga kapaltahan, kakulang sang diplomatic skills sa pagresolbar sa problema kag ang paghingalit sa hospitality sang probinsiya pinaagi sa pagtenir sa Governor’s mansion nga pamatood lamang nga indi ini residente sang Capiz.
Bangud diri, nagpanindugan ang tagsulat nga ginarekomendar sini sa gobernador ang pagrevoke ukon pagrecall sa appointment ni Monares bilang provincial administrator.
Kun wala sang himoon nga tikang ang gobernador, maga-file ang tagsulat sang resolution sa Sangguniang Panlalawigan nga nagawithdraw sang iya pirma kag boto para sa kumpirmasyon ni Monares bilang provincial administrator.
Nagapati ini nga mabutang sa alang alang ang liderado ni Governor Contreras kag maapektuhan ang probinsdiya kun magapabilin pa sa pwesto si Monares.
