ROXAS CITY – Wala sang kamatuoran nga tuman ka mahal ang pagpanukot sang arkabala sa mga pwesto kag may dako nga pagsaka sa presyo sang mga balaklon sa Teodoro Arcenas Trade Center (TATC).
Ini ang ginpanindugan ni market administrator Heloise Mendoza sang mainterview sang Bombo Radyo.
Suno kay Mendoza nga indi sang matuod nga tuman ka mahal ang ila pagpanukot sang arkabala bangud nagasunod lamang ini sa pagsuluktan sandig sa Roxas City Revenue Code.
Ginpahayag sini nga ginapatuman nila sang ensakto ang pagsuluktan kag wala ginadugangan ang presyo sang pagsukot sa mga nagakuha sang pwesto sa amo nga merkado.
Pag-abot naman sa presyo sang mga balaklon, ginpahayag ni Mendoza nga nagapabilin sa estable ang presyo sang mga balaklon sa merkado.
Suno diri nga nagadepende lamang ang mga manugbaligya sa presyo sang ila ginakuhaan sang produkto kag ginapatungan lamang ini sang minimal nga ginansiya.
Apang suno kay Mendoza may mga produkto nga nagasaka gid ang presyo kapareho na lamang sang bawang nga yara na karon sa 180 tubtob 200 pesos ang kilo.
Matandaan nga una na nga ginpahayag ni City Councilor Albert Gregory Potato, Chairman sang Committee on Ways and Means sang Sangguniang Panlungsod, nga magapatigayon sila sang price monitoring sa mga balaklon agud mahibaluan ang rason sang pagtaas sang presyo sang mga baligya sa TATC.
Magluwas sa price monitoring hibaluon man sang komitiba ang nagakaigo nga pagsuluktan sa arkabala sa mga puwesto bangud nakalab-ot sa ila nga nagsaka ang pagsuloktan sini sa TATC.
