Tuman ang pagpasalamat sang isa ka board passer sa Ginoo nga nakapasar ini sa ginpatigayon nga February 2026 Criminology Licensure Examination.
Sa interview sang Bombo Radyo kay Edmar Apolinario, tumandok sang Población Tabuc, Maayon, Capiz kag board passer sang February 2026 Criminology Licensure Examination, iya ginpahayag nga ang iya senior amo ang nagpabalo sa iya nga yara ini ang iya pangalan sa nakapasar sa board exam.
Suno sa iya, tuman gid ang iya pagpasalamat bangud ang iya nga sakripisyo kag pagpangabudlay nabayluhan sang kalipay.
Dugang pa niya, nga indi siya makapati nga makapasar bangud tuman kabudlay ang exam.
Apang, para sa iya ang Ginoo amo ang naggabay kag nagbulig sa iya nga matuman niya ang iya sini nga madugay na nga handom.
Nagpasalamat man ini sa iya nga pamilya nga wala nag-untat sa paghatag sa iya sang supporta kag padayon nga nagasalig sa iya.
Mensahe sini sa kaangay man nga estudyante kag magakuha sang exam, nga mag-review gid sang maayo, indi pag-ipressure ang kaugalingon, magpangamuyo sa Ginoo kag himuon nga motivation ang mga tawo nga wala nagasalig sa imo agud matuman mo ang imo sini nga handom.
