Pagsalig sa kaugalingon kag suporta sang pamilya ang nangin liyabi sang isa ka LET passer sa iya pagkapasar.
Sa interview sang Bombo Radyo kay KC Grace Posadas, tumandok sang Barangay Dinginan, Roxas City Bachelor of Secondary Education major in Science sa Capiz State University Main Campus, iya ginpahayag nga indi ini ang kurso nga handum niya apang bangud sa motivation sang iya anay manunudlo kag mga abyan, iya gin-pursue ang education.
Suno kay Posadas, mapinalanggaon kag suportado ang iya ginikanan sa tanan niya nga kinahanglanon samtang naga-eskwela siya, gani daku ang iya pagpasalamat sa ila nga wala gid nagpabaya sa iya.
Pahayag pa niya, kada mabatyagan niya ang kakapoy kag kabudlayan sa pagtuon, ginapanumdom niya ang iya mga handum kag goal para sa pamilya kag sa iya nga kaugalingon agud magpadayon kag indi madulaan sang kusog.
Dugang pa sini, wala gid siya nagpaabot nga makapasar sa nasambit nga examination, apang pinaagi sa pagsalig sa Ginoo kag pagtuon sang maayo, nangin dalan ini agud maangkon niya ang kadalag-an.
Mensahe sini sa mga estudyante nga indi gid dapat magdula sang paglaum kun nakabatyag sang kabudlayan bangud may plano ang Ginoo agud mahatagan sang mas maayo nga kabuhi sa atun palaabuton.
