ROXAS CITY – Ginakabig nga “generally peaceful” ang pagsug-alaw sang Bag-ong Tuig 2021 sa probinsya sang Capiz.
Ini ang ginpahayag ni Police Colonel Julio Gustilo Jr., ang Provincial Director sang Capiz Police Provincial Office sang mainterview sang Bombo Radyo Roxas.
Suno kay Gustilo nga wala man sang dalagkuan nga mga insidente nga natabo kadungan sang pagsug-alaw sang tuig 2021 apang nagaupod ini sa pagpangasubo sang pamilya sang mga nagtaliwan nga mga indibidwal bangud man sa asud-asud nga mga aksidente sa dalanon.
Ginpahayag man sini nga wala sang may napagkit nga mga biktima sang stray bullets kag indiscriminate firing.
Nagapati naman ini nga disiplinado ang mga kapulisan sa probinsya kabangdanan nga indi ang mga ini maghimo sang aksyon nga makapalain sa ila.
Dugang pa sang opisyal nga gina-ekspektar na ang madamo nga mga aksidente sa dalanon bangud man sa magkatuhay nga mga selebrasyon.
