ROXAS CITY – Dismayado ang Simbahan Katolika sa pagsulod sang Small Town Lottery ukon STL sa probinsiya sang Capiz.
Kilala ang mga Capizeño sa pagka-konserbatibo kag relihiyoso, rason nga madamo ang nakibot sang mahibaluan nga magasugod na ang operasyon sang STL sa maabot nga Agosto 9, 2017.
Suno kay Monsignor Cyril Villareal, vicar general sang Archdiocese of Capiz nga hugot nga ginapamalabagan sang simbahan ang sugal, bangud wala ini sang matuga nga kaayuhan sa kabuhi sang tawo.
Ginpahayag pa ni Villareal kun mangin bukas lamang ang mga tawo nga nalulong sa sugal, makita nila ang negatibo nga epekto sini.
Sa pihak nga madamo ang nagapati nga dibersyon lamang ang sugal, apang sa ulihi mahulog ini sa adiksyon tobtob nga ang kuwarta nga ibakal kuntani sini sang pagkaon ang itaya pa sa sugal.
Ginpahanumdum man sini ang publiko nga kun luyag mag-asenso ang kabuhi, dapat nga magpanikasog kag magtrabaho kag indi magsalig sa sugal.
